//ffor to make mede. Tak .i. galoun of fyne hony and to
þat .4. galouns of water and hete þat water til it be as
lengh þanne dissolue þe hony in þe water. thanne set hem
ouer þe fier & let hem boyle and ever scomme it as longe as
any filthe rysith þer on. and þanne tak it doun of þe fier
and let it kole in oþer vesselle til it be as kold as melk
whan it komith from þe koow. than tak drestis
of þe fynest ale or elles berme and kast in to þe water
& þe hony. and stere al wel to gedre but ferst loke er
þu put þy berme in. that þe water with þe hony be put
in a fayr stonde & þanne put in þy berme or elles þi
drestis for þat is best & stere wel to gedre/ and ley straw
or elles clothis a bowte þe vessel & a boue gif þe wedir
be kolde and so let it stande .3. dayes & .3. nygthis gif
þe wedir be kold And gif it be hoot wedir .i. day and
.1. nyght is a nogh at þe fulle But ever after .i. hour or
.2. at þe moste a say þer of and gif þu wilt have it swete
tak it þe sonere from þe drestis & gif þu wilt have it scharpe
let it stand þe lenger þer with. Thanne draw it from
þe drestis as cler as þu may in to an oþer vessel clene & let
it stonde .1. nyght or .2. & þanne draw it in to an
oþer clene vessel & serve it forth // And gif þu wilt
make mede eglyn. tak sauge .ysope. rosmaryne. Egre-
moyne./ saxefrage. betayne./ centorye. lunarie/ hert-
is tonge./ Tyme./ marubium album. herbe jon./ of eche of
an handful gif þu make .12. galouns and gif þu mak lesse
tak þe less of herbis. and to .4. galouns of þi mater .i. galoun of
drestis.